ក្រសួងពាណិជ្ជកម្មបដិសេធចំពោះការអះអាងថាអង្ករ និងផ្លែឈើកំប៉ុងថៃរងការបំពុល

Issue 61

បន្ទាប់ពីមាន Facebook ដែលបង្ហោះមកពីសហរដ្ឋអាមេរិក អះអាងថាអង្ករដែលនាំមកពីប្រទេសថៃមានលាយជាមួយផ្លាស្ទិច រដ្ឋមន្រ្តីក្រសួងពាណិជ្ជកម្ម អ្នកស្រី Apiradi Tantraporn បានធ្វើការបញ្ជាក់នៅថ្ងៃទី 6 ខែមករា ថា អង្ករដែលនាំចេញពីប្រទេសថៃមិនបានលាយជាមួយសារធាតុដទៃទៀតឡើយ។

អ្នកស្រី Apiradi Tantraporn បានមានប្រសាសន៍ថា "Siam Grains ដែលជាក្រុមហ៊ុននាំចេញអង្ករម្លិះដែលមានម៉ាកសញ្ញា បានលើកឡើងនៅលើប្រព័ន្ធផ្សព្វផ្សាយផ្នែកសង្គមថា ក្រុមហ៊ុនមានទំនុកចិត្តថាផលិតផលរបស់ក្រុមហ៊ុនពុំមានសារធាតុចម្លែកៗឡើយ ពីព្រោះក្រុមហ៊ុនប្រើប្រាស់បច្ចេកវិទ្យាផលិត និងវេចខ្ចប់បែបទំនើប"។ "អង្ករថៃមានគុណភាពខ្ពស់ ហើយអង្ករទាំងនេះបានឆ្លងកាត់ដំណើរការត្រួតពិនិត្យគុណភាពយ៉ាងតឹងរឹងមុនពេលនាំចេញ"។

រដ្ឋមន្រ្តីបានបញ្ជាក់ថា ក្រុមហ៊ុននាំចូលកំពុងពិចារណាចាត់វិធានការផ្លូវច្បាប់ដែលអាចធ្វើទៅបាន ដើម្បីប្រឆាំងនឹងបុគ្គលដែលបានបង្ហោះវីឌីអូនៅលើ Facebook។

ស្របពេលជាមួយគ្នានេះផងដែរ អគ្គនាយករបស់ DITP អ្នកស្រី Malee Choklumlerd បានបដិសេធចំពោះពាក្យចចាមរ៉ាមនាពេលថ្មីៗនេះដែលនិយាយថា ផ្លែឈើកំប៉ុងរបស់ប្រទេសថៃត្រូវបានបំពុលដោយមេរោគអេដស៍។

អ្នកស្រី Choklumlerd បានមានប្រសាសន៍ថា "សារនេះគឺជាការបោកបញ្ឆោត"។ "មេរោគអេដស៍ត្រូវការកោសិការបស់មនុស្សដើម្បីរស់នៅ ហើយវាមិនអាចរស់នៅខាងក្រៅខ្លួនមនុស្សបានយូរឡើយ។ អាស្រ័យហេតុនេះ វាទៅមិនរួចនោះទេ ដែលផលិតផលកំពុងត្រូវបានបំពុលដោយមេរោគអេដស៍នោះ។ ផលិតកំប៉ុងរបស់ប្រទេសថៃបានទទួលការត្រួតពិនិត្យយ៉ាងដិតដល់ និងទទួលបានការបញ្ជាក់ស្របតាមស្តង់ដារអន្តរជាតិ មុនពេលនាំចេញតាមកប៉ាល់"។