ថៃទាក់ទាញអ្នកវិនិយោគចិន

Issue 54

លោកឧបនាយកដ្ឋមន្ត្រី Somkid Jatusripitak អបដំណើរដោយលោកឧបរដ្ឋមន្ត្រីក្រសួងពាណិជ្ជកម្ម Suvit Maesincee មន្ត្រីរដ្ឋាភិបាល និងអ្នកវិនិយោគធំៗ បានបំពេញទស្សនកិច្ចផ្លូវការនៅប្រទេសចិនពីថ្ងៃ 26 ដល់ 30 ខែមិថុនា។

លោកឧបនាយករដ្ឋមន្ត្រី Jatusripitak មានប្រសាសន៍ទៅកាន់អ្នកវិនិយោគចំនួន 500 នាក់នៅឯសន្និសីទស្តីពីការវិនិយោគក្រោមប្រធានបទ "ប្រទេសថៃ៖ ការឆ្ពោះទៅកាន់ការរីកចម្រើនដោយចិរភាព" ដែលប្រព្រឹត្តឡើងនៅថ្ងៃទី27 ខែមិនថុនា នៅទីក្រុងសៀងហៃ ថា "វាជាឱកាសដ៏ល្អសម្រាប់អ្នកវិនិយោគចិនក្នុងការពង្រីកការវិនិយោគ និងអាជីវកម្មរបស់ខ្លួនទៅបណ្តាប្រទេសអាស៊ាន ដោយប្រើប្រាស់ប្រទេសថៃជាច្រកចេញចូលសំខាន់ទៅក្នុងតំបន់នេះ។"

ព្រឹត្តិការណ៍នេះបានបញ្ជាក់ធ្ងន់អំពីឱកាសធ្វើការវិនិយោគនៅក្នុងប្រទេសថៃ ជាពិសេសក្នុងវិស័យបច្ចេកវិទ្យាគមនាគមន៍និងព័ត៌មាន (ICT) យានយន្ត អេឡិកត្រូនិក ទេសចរណ៍ គ្រឿងសម្ភារៈបរិក្ខារទូរគមនាគមន៍ និងគ្រឿងម៉ាស៊ីន។

យោងតាមទិន្នន័យផ្លូវការឱ្យដឹងថា រដ្ឋាភិបាលថៃបានអនុម័តគម្រោងវិនិយោគចិនចំនួន 172 ដែលមានតម្លៃចំនួន 85.2 ពាន់លានបាតរវាងឆ្នាំ 2010 និងឆ្នាំ 2014។ ផ្នែកវិនិយោគខ្ពស់ជាងគេមាន គ្រឿងចក្រ យានយន្ត បន្ទះសូឡា និងគ្រឿងបង្គំរថយន្ត។