ការចាប់យកស្មារតីនៃគំនូរជីវចល

Issue 49

ឧស្សាហកម្មគំនូរជីវចលថៃកំពុងឈានដល់ជំនាន់ថ្មីនៃអ្នកបង្កើតគំនូរជីវចលដែលមានទេពកោសល្យ។

ឧស្សាហកម្មដែលមានលក្ខណៈបង្កើតថ្មីនៅប្រទសថៃ ត្រូវបានជំរុញដោយវិស័យឯកជននិងសាធារណៈ ចាប់ពីស្ទូឌីយោគំនូរជីវចលដែលបង្កើតថ្មី ទៅការគាំទ្រដែលផ្តល់ដោយ DITP និងភ្នាក់ងារលើកកម្ពស់ឧស្សាហកម្មសូហ្វវែរ (SIPA)។

កាលពីខែធ្នូ ឆ្នាំ២០១៥ បាននាំយកក្រុមហ៊ុនគំនូរជីវចលថៃចំនួន៥ ទៅចូលរួមកិច្ចប្រជុំកំពូលគំនូរជីវចលអាស៊ី (AAS ឆ្នាំ២០១៥) ដែលបានប្រារព្ធនៅកោះ Jeju ប្រទេសកូរ៉េខាងត្បូង។

អគ្គនាយក DITP លោកស្រី Malee Choklumlerd បានមានប្រសាសន៍នៅមុនពេលព្រឹត្តការណ៍ថា "កម្មវត្ថុគឺដើម្បីបង្ហាញពីសក្តានុពលនៃក្រុមហ៊ុនឧស្សាហកម្មគំនូរជីវចលថៃ នៅព្រឹត្តិការណ៍អន្តរជាតិដែលជាកន្លែងដែលមានឱកាសទំនាក់ទំនងជាមួយអ្នកបង្កើតគំនូរជីវចល អ្នកវិនិយោគ ដៃគូនិងអ្នកផ្សាយសំឡេងតាមវិទ្យុ ឬ ទូរទស្សន៍ល្បីៗ"។

ស្ទូឌីយោ Moonhouse គឺជាស្ទូឌីយោ១ ក្នុងចំណោមស្ទូឌីយោគំនូរជីវចលទាំង៥ ដែលត្រូវបានជ្រើសរើសសម្រាប់សកម្មភាព ដែលត្រូវបានបង្កើតដោយ Kid Screen នៅប្រទេសកូរ៉េខាងត្បូង។

អ្នកបង្កើត Moonhouse លោក Pavidcha Arayaphong លើកឡើងថា "នៅ AAS ២០១៥ ពួកយើងព្យាយាមលក់គម្រោងរបស់ពួកយើងទៅកាន់ក្រុមហ៊ុនចែកចាយនៅទូទាំងពិភពលោក។ វាជាឱកាសដ៏ល្អសម្រាប់ក្រុមរបស់យើង ហើយយើងក៏អាចទទួលបានចំណេះដឹងអំពីវិធីដែលប្រទេសផ្សេងទៀតបង្កើតភាពយន្តគំនូរជីវចល"។

បន្ទាប់ពីធ្វើការជាអ្នកបង្កើតគំនូរជីវចលជាង ១០ឆ្នាំនៅសហរដ្ឋអាមេរិក លោក Arayaphong បានត្រឡប់មកប្រទេសថៃដើម្បីចាប់ផ្តើមស្ទូឌីយោផ្ទាល់ខ្លួនរបស់លោកនៅដើមឆ្នាំ២០១៥។

លោក Arayaphong បានបន្តទៀតថា "កាលពីខ្ញុំនៅក្មេង ខ្ញុំពិតជាចូលចិត្តគូរគំនូរនិងមើលគំនូរជីវចល។ បន្ទាប់ពីខ្ញុំបានបញ្ចប់ការសិក្សាផ្នែកស្ថាបត្យកម្ម ខ្ញុំបានចាកចេញទៅសហរដ្ឋអាមេរិកដើម្បីបន្តការសិក្សារបស់ខ្ញុំ។ នៅពេលនោះ មិត្តរួមបន្ទប់របស់ខ្ញុំបានបបួលខ្ញុំទៅរៀនថ្នាក់គំនូរជីវចល ជាមួយគាត់ ហើយវាក៏ជាការដែលខ្ញុំចាប់ផ្តើមរៀនគំនូរជីវចលដែរ។ ដូចនេះ ខ្ញុំបានស្នាក់នៅក្នុងសហរដ្ឋអាមេរិកអស់រយៈពេល ១៤ឆ្នាំ ដើម្បីរៀននិងធ្វើការជាអ្នកច្នៃម៉ូដក្នុងដំណាក់កាលដំបូងនៃផលិតកម្ម"។

លោក Arayaphong ប្រាប់ថា វាអាចចំណាយរយៈពេលពី ៦ ទៅ ៧ឆ្នាំ ដើម្បីបញ្ចប់ភាពយន្តគំនូរជីវចលមួយ ចាប់ពីដំណាក់កាលដំបូងនៃការផលិត រហូតដល់ការបញ្ចាំង។

លោកបានបន្ថែមទៀតថា "ភាពយន្តគំនូរជីវចលខ្លះដែលខ្ញុំបានផលិតនៅសហរដ្ឋអាមេរិកគឺ Penguins of Madagascar និង Strange Magic ។ នៅសហរដ្ឋអាមេរិក ខ្ញុំក៏បានធ្វើការជាមួយ Dreamworks និង Lucasfilm ដែរ"។

លោក Arayaphong ជឿថា ឧស្សាហកម្មគំនូរជីវចលនៅប្រទេសថៃ បានដើរអស់ជាច្រើនឆ្នាំមកហើយ។ ហើយបច្ចុប្បន្ននេះ មានផលិតផលសូហ្វវែរសម្រាប់គំនូរជីវចលជាច្រើននិងអ្នកជំនាញក្នុងឧស្សាហកម្មមានចំណាប់អារម្មណ៍ក្នុងការសិក្សាចំណេះដឹងថ្មីនិងអភិវឌ្ឍជំនាញរបស់ពួកគេ។ លោកបន្ថែមទៀតថា និស្សិតដែលបញ្ចប់ការសិក្សាពីសាកលវិទ្យាល័យដូចជា Silpakorn និង Mahidol កំពុងផលិតគំនូរជីវចលល្អៗសម្រាប់សារណារបស់គេ។

លោកមានយោបល់ទៀតថា "ចំណុចសំខាន់ដែលជាបេះដូងនៃគំនូរជីវចលគឺការប្រាប់ពីដំណាលរឿង។ ខ្ញុំជឿថាប្រសិនបើយើងអាចធ្វើបានល្អ គំនូរជីវចលថៃនឹងទទួលបានជោគជ័យ។ អ្នកនៅក្នុងឧស្សាហកម្មនេះ គឺមានលក្ខណសម្បត្តិខ្ពស់ ហើយពួកគេត្រៀមលក្ខណៈជាស្រេចសម្រាប់ឱកាសក្នុងការផលិតភាពយន្តគំនូរជីវចលថ្មី"។

បំណងរបស់លោក Arayaphong គឺផលិតគំនូរជីវចលល្អៗ ដែលធ្វើឱ្យមនុស្សគ្រប់រូបចូលចិត្តទស្សនា។ លោកបាននិយាយថា "អត្ថន័យរបស់រឿងអាចមិនចាំបាច់ទាក់ទងនឹងវប្បធម៌របស់ប្រទេសថៃឡើយ វាអាចជារឿងដែលមានលក្ខណៈកំប្លែងនិងសប្បាយ"។

សម្រាប់ព័ត៌មានបន្ថែម សូមចូលទស្សនាគេហទំព័រ http://m-h-studio.com

ព័ត៌មានទាក់ទងនឹង DITP

អត្ថបទដោយ Pimsirinuch Borsub